Gasteiz-eko zaintzen ekimenak

Mapaketa kolektiboko tailerren ondorioz,  hiriko zaintza-ekimenen kartografia bat diseinatu genuen. Ekimen horiek beren ekintzak garatzen dituzten eremuaren arabera sailkatzen dira, arreta ematen dieten onuradunen profilaren arabera eta eragile sustatzaileen arabera.

Ekimenak maparatzeak aukera ematen du horiek ezagutzeko eta konektatzeko, hiriko zaintza-ekosistema ikusteko, baterako aukera-eremuak aurkitzeko eta hurbiltasuneko aliantzak identifikatzeko. Gure hirietatik eredu erresilienteago eta jasangarriagoetarako trantsizioa gure interdependentzia onartzea dela ulertuta, espero dugu mapa hau eta tailerretan partekatutako praktikak eta ezagutzak sinergiak sortzeko eta hobetzeko espazioak hautemateko tresna izatea.

Gasteizko ekimenen geolokalizazio hori askoz ere sare handiago baten parte da orain, CIVICS, plataformaren barruan baitago, mapaketa digitalerako tresna bat, gure hirietan berrikuntzari eta herritarren ekintzari buruz dagoen informazio guztia aurkitzeko eta gehitzeko, lotutako ekitaldiak aurkitzeko eta horietan parte hartzeko. Sare horrek Iberoamerika osoko herritarren jarduera jasotzen du, eta erakusten digu pertsona askok elkarrekin lan egiten dutela ingurune inklusiboagoak, ekosozialagoak eta parte-hartzaileagoak eraikitzeko.

Zaintza-ekimenak aztertzeari esker, oraindik konpondu gabe dauden ahalmenak, aukerak eta beharrak bistaratu ahal izan dira. Esperientziatik ikasteko eta hobetu beharreko arloak hautemateko aukera ere eman du.

Mapak ekimenak lokalizatzea eta ekimenaren irismena eta aniztasuna bistaratzea ahalbidetzen badu ere, liburu honetan xehetasun handiagoz jasotzen da horietan parte hartzen duten pertsonek gizartearen hainbat esparrutatik egindako lan eskerga. Horretarako, katalogo bat sortzen dugu, eta bertan jasotzen dira ekimen bakoitzaren berezitasunak, proiektu zehatzak eta lan-eremuak, haien izaera eta pertsona eta eremu sozialena, COVID-19 pandemian beren zerbitzuak bideratu dizkietenak.

Katalogo honetan jasotako alderdien artean daude Garapen Jasangarriko Helburuak, beren lana eta ekintzak gehien irudikatu dituen GJHren arabera ekimenak kategorizatzen lagundu dutenak. Zaintzaren ekimenak ezinbestekoak dira gure lurraldeak ingurune bizigarriagoetara, inklusiboagoetara eta gure planetarekiko errespetuzkoetara igarotzeko eta eraldatzeko.
Zaintza-ekintzak egoteak eta sustatzeak pertsonen bizitza hobetzen laguntzen du, inor atzean utzi gabe, eta, horrela, Agenda 2030ean onartutako 17 GIH betetzen dira. Ekimen horiek helburu horietara hurbiltzen gaituzte, eta ereduzko eta ezinbesteko jardunbidetzat hartu behar ditugu.

Zaintzak balioetsiko dituen hiri bat sortzen parte hartzen duten erakundeak eta esperientziak ikusarazteko, konektatzeko eta laguntzeko tresna da liburua. Gasteizko hiriko zaintza-praktiken eta -harremanen inguruan identifikatzea eta sentsibilizatzea lagungarria izan liteke horrelako praktikak gizarte-kontzientziaren, komunitate-garapenaren, politika publikoen eta hiri-diseinuaren erdigunean jartzeko.

Espero dugu osasun-larrialdi honen aurrean sortu diren edo egokitu diren ekimenetako batzuk biltzen dituen katalogo honek aldarrikatzea beharrezkoa dela etorkizun hurbilean beren lana mantentzen eta babesten laguntzea, hiri zaintzaileago bat eraikitzen jarrai dezaten, guztion onerako egiten duten lana erraztuz.