About This Project
Alokairu sozialeko etxebizitza babestuak berdatzen laguntzeko ikerketa
Eraikinen eremu amankomunetan lorategi komunitarioak sortzea sustatu nahi duen ikerketa-proiektua da Landarearten, natura etxebizitzetan integratzeko eta elkarguneak eta kohesio soziala sortzeko.
Azken urteotan, etxebizitzaren funtzio sozialak agenda politiko eta sozialean indarra hartu du, bizigarritasun-krisiari aurre egiteko premia geroz eta larriagoa baita maila globalean. Aldi berean, birnaturalizazio estrategiak eztabaida publikoan jarri dituzte krisi klimatikoak eta planetaren biodibertsitatearen galerak. Natura eskuragarri izatea bizimodu osasungarri bat mantentzeko ezinbestekotzat aldarrikatzen da.
Ikerketa honek lorategi komunitarioak ekitate espaziala defendatzeko neurri gisa proposatzen dituzte, irisgarritasun, autonomia, soziabilitate eta bizigarritasuneko oinarrizko eskubideak berreskuratzen dituztela aldarrikatuz.
Gizarte-harremanak eraikitzeko ingurune osasungarriak eskaini nahi zaizkie komunitateei, kohesioa eta bizikidetza bultzatuz, nortasuna eta kidetasun-sentimendua sortzen lagunduz, naturarekiko irisgarritasuna bermatuz eta eraikinak mantentzeko eta hobetzeko irtenbide ekologikoak eskainiz.
Ekimena Alokabidek sustatu du, Euskadiko alokairu soziala kudeatzen duen Eusko Jaurlaritzaren menpeko sozietate publikoak.
Landareartean, Eusko Jaurlaritzako Etxebizitza Zuzendaritzak ZERO Plus Plan barruan sustatutako 27 proiektuetako bat da. Alokairu sozialeko etxebizitza babestuen berrikuntzara bideratuta dagoen plana da, aro digitalera eta pertsonen zerbitzura egokitutako etxebizitza klimatiko neutro eta berdeak garatzea helburu dituena.
Hortaz, Alokabidek kudeatzen dituen etxebizitzetan bizi diren pertsonei arreta berezia eman zaie ikerketan. Etxebizitza horien % 17k besterik ez du berdegune bat hurbileko ingurunean; guztiak eraikinaren kanpoko patio edo eremuetan. Gehienak biodibertsitate mugatuko lorategiak dira, eta landare-espezie gutxi dituzte. Auzokideen interesei erantzungo dien erabilera-proiekturik ez garatu izanak, gainera, berdegune horiek bizikidetzarako eta komunitatea eraikitzeko duten ahalmena mugatzen du.
Espazio komunak (teilatu lauak, fatxadak, balkoiak, zirkulazio-eremuak, lokalak eta kanpoko eremuak) eta komunitateen ezaugarri sozialak kontuan izanda, komunitateei landare-sistemak ezartzen eta espazio komunak diseinatzen eta kudeatzen laguntzeko gida bat proposatzen da. Gidak urratsez urratsezko ibilbide bat eta zenbait baliabide biltzen ditu.
Zenbait baliabide etxebizitza-parkearen ezaugarri espezifikoak abiapuntu izanda diseinatu dira. Dena den, beste edozein auzo-erkidegok erabil ditzake oinarri gisa.
Lorategi komunitarioek bizikidetza lagundu dezakete. Jarduerak partekatzeko eta harreman sozialak ezartzeko topagune gisa erabil daitezke. Gainera, berdeguneek pertsonen bizi-kalitatea hobetzen dute, ingurune osasungarriagoa eta atseginagoa eskaintzen baitute; kutsadura akustikoa eta atmosferikoa murrizten dute, airearen kalitatea hobetu dezakete eta itzala eta freskotasuna eman dezakete bero-garaietan. Komunitateak berdeguneak zaintzen eta kontserbatzen lagun dezake, eta horrek gizarte-loturak sendotzen eta bizikidetza hobetzen lagun dezake.
Ibilbidea
